6 желтоқсан 2024
Осы мақаламен бөлісіңіз“Deans’ School” бағдарламасы теория мен практиканың өзекті мәселелерді шешуге қалай үйлесетінін көрсететін жарқын үлгі болды.
2024 жылдың қыркүйегінен желтоқсанына дейін NU Білім беру Жоғары мектебі (NU GSE) деканы, доктор Аида Сағынтаева басшылығымен ұйымдастырылған “Academic Leadership Institute: Deans’ School” 33 қазақстандық университеттің 75 деканы үшін бірегей білім беру бастамасына айналды. Тоғыз модульден тұратын бұл кәсіби бағдарлама қатысушыларға стратегиялық көшбасшылық пен ғылыми зерттеулерді басқарудан бастап этикалық стандарттарды енгізу мен инновациялық экожүйелерді құруға дейінгі университеттерді басқарудың негізгі аспектілерін тереңірек түсінуге мүмкіндік берді.
Бағдарламаның соңғы кезеңі – топтық жоба болды. Бұл факультеттер мен мектептердің даму моделі қатысушылардың бірнеше айлық еңбегінің шыңы ретінде ұсынылды. Декандар медицина ғылымдары, инженерия, гуманитарлық ғылымдар және бизнес сияқты академиялық бағыттар бойынша командаларға бөлініп, білім беру сапасын арттыру, ғылыми қызметті күшейту, бизнес-процестерді оңтайландыру және цифрлық технологияларды енгізу үшін онлайн және офлайн форматта тығыз жұмыс жасады.
Қатысушыларға NU Білім беру Жоғары мектебінің профессорлары доктор Норин Дуррани, Ахмет Айпай, Дуишонқұл Шаматов, сондай-ақ институционалдық зерттеулер, деректерді талдау және ұйымдық даму саласындағы сарапшылар тәлімгерлік етті. Бұл пәнаралық көзқарас қазақстандық университеттердің қажеттіліктеріне бейімделген инновациялық шешімдерді әзірлеуге ықпал етті.
.jpg)
2024 жылдың 6 желтоқсанында қатысушылар өз жобаларын Қазақстан Республикасының Ғылым және жоғары білім министрлігінің өкілдері мен академиялық басқару саласындағы жетекші мамандардан тұратын сараптамалық комиссияға ұсынды. Әрбір команда қазақстандық университеттердегі факультеттер мен мектептердің жұмысын жетілдіруге бағытталған практикалық ұсыныстар ұсынуы тиіс. Бұл ұсыныстар Қазақстан Республикасының Ғылым және жоғары білім министрлігіне стратегиялық нұсқаулық болатын қорытынды құжатқа біріктіріледі.
Бағдарламаның сегізінші және тоғызыншы модульдері қатысушылар үшін маңызды кезеңдер болды. Сегізінші модуль, ғылыми зерттеулерді басқаруға арналған, декандарды зерттеу экожүйелерін дамыту, жарияланымдық белсенділік және зияткерлік меншікті қорғау саласындағы негізгі аспектілермен таныстырды. Ал тоғызыншы модульде институционалдық мәдениет пен этикаға назар аударылып, академиялық адалдықты нығайту, плагиаттың алдын алу және инклюзивті білім беру ортасын құру стратегиялары талқыланды.
Қатысушылар жаңа дағдылар мен тәсілдерді меңгеріп қана қоймай, Қазақстанның жоғары білім беру жүйесінде ауқымды өзгерістер жасауға негіз қалады. Олардың жобалары мен ұсыныстары академиялық көшбасшылықты дамытуға және қазақстандық университеттердің бәсекеге қабілеттілігін нығайтуға маңызды үлес қосады.
